|
|
Ondskapens slott
Resymè: Original tittel: Castle of Evil.
Det trettande fantomet er på gjennomreise i Europa, og ein dag kjem han til Zellerstadt midt under karnevalet. Under opptoget mister ein mann på stylter balansen, og dett over ein mann til hest. Fantomet får frakta den skadde til legen, og vert kjend med mannen som heter Jacob Grimm. På sjukehuset ser dei eit måleri av ei vakker kvinne, baronesse Germaine, som seiast å vere sjukehuset si beskyttarinne. På måleriet har ho eine handa i ein hanske, for den vart misdanna etter at den vart knust i ei vogndør.
Etterpå dreg Fantomet og Jacob vidare. Medan dei rir gjennom skogen, høyrer dei ulvehyl. Dei rir for å sjå kva det er, og oppdagar at ein ulveflokk går laus på ei vogn. Fantomet greier å skremme ulvane. Vogna tilhøyrer den unge Lorelly, dotterdottera til baronesse Germaine. Ho er på veg til slottet hennar, Rosenhag, så Fantomet og Jacob vert med dit, sidan mørket fell på.
På Rosenhag treffer dei den gamle stallkaren Hans, som verkar bekymra over Lorelly sitt besøk. Dei vert også snart kjende med fader Karl Wolfgang, baronessa sin andelege rådgjevar. Fantomet og Jacob vert innkvarterte på kvar sitt rom, og inviterte til middag. På veg ned i matsalen, fortel Lorelly at ho er litt redd. Mormora er så forandra.
Nede ved middagsbordet skjønar Fantomet kva ho meiner. Mormora er ikkje lenge vakker, men eit stygt vesen med ein ubehageleg væremåte. Etter middag spelar Lorelly piano for mormora og gjestene, og baronessa gjev uttrykk for at ho hadde ynskt barnebarnet skulle bli resten av livet.
Fantomet går og legg seg, men får ikkje sove. Etterkvart sovnar han likevel, berre for å bli vekt at eit fælt ulvehyl. Rett etterpå høyrer han nokon som skrik i dødsangst, og Fantomet spring ut på balkongen og klatrar ned. Han finn friskt blod og ulvespor på bakken. Tilfeldigvis kastar Fantomet eit blikk opp, og får sjå ein diger ulv. Ulven hoppar, men Fantomet får tak i ei klubbe som han slår beistet med.
Dagen etter skal Fantomet og Jacob reise. Fader Karl Wolfgang tek farvel med dei. Han har ein bandasje rundt hovudet, og forklarar at han snubla då han skulle undersøkje nokre merkelege lydar den natta. Jacob og Fantomet tek farvel, men Fantomet kjenner likevel på seg at noko ikkje er rett.
Tilbake på Rosenhag har fader Karl Wolfgang og baronesse Germaine ei samtale. Baronessa er bekymra for Fantomet, og ho ber Karl Wolfgang ordne opp i det.
Jacob og Fantomet når eit vegkryss, og skal til å ri kvar sin veg. Så kjem Fantomet på kva som var gale, nemleg hansken til baronessa. Baronesse Germaine som dei møtte på Rosenhag hadde nemleg ikkje nokon hanske. Dei dreg til Zellerstadt for å undersøkje, for dei skjønar at Lorelly er i fare.
I kyrkjeboka finn Jacob og Fantomet ut at baronesse Germaine har ei tvillingsyster, Irma. Presten bed Jacob og Fantomet spørje kona til klokkemakaren for meir informasjon, og det gjer dei. Kona til klokkemakaren fortel at baronesse Germaine og Irma vart fødde på valborgsmesse (30. april) under heksesabbaten. Medan Germaine vart god og snill, vart Irma ond. Før dei reiser vidare til Rosenhag gjev klokkemakaren Fantomet eit par sølvkuler.
Utanfor klokkemakarhuset står tre menn. Dei har tenkt å rulle Fantomet i tjære og fjør, men Fantomet bankar dei opp, og får vite at det er fader Karl Wolfgang som har sendt dei.
Då Fantomet og Jacob kjem til Rosenhag, får dei vite at Karl Wolfgang og Irma har teke Lorelly til jakthytta på eit fjell som heiter Wolfenhöle Gebirge. I jakthytta står Lorelly åleine, men så opnar døra seg. Inn kjem to kappekledde skikkelsar: Irma og Karl Wolfgang. Dei fortel at det er på tide Lorelly vert ein av dei. Irma og Karl Wolfgang tek med seg Lorelly ut, og bind henne fast i ein bolt festa til eit berg. Det er nemleg valborgsmesse og fullmåne denne natta, og Lorelly skal bli ein varulv. Irma og Karl Wolfgang høyrer at Fantomet og Jacob kjem, og dei gøymer seg.
Jacob og Fantomet kjem fram til Lorelly, som har svima av. Akkurat i det dei står der, kastar ein diger ulv seg over dei. Fantomet skyt den i spranget, og den fell utfor berget medan den skrik - eit skrik som lignar eit menneskeskrik. No kjem det fleire ulvar, så dei tre må rømme inn i jakthytta. Men det er ikkje nok, for ulvane kjem inn vindauget og. Fantomet kastar ein brennande kubbe etter dei, og hytta tek fyr. Fantomet går inn på soverommet for å finne in utgang, men der ventar ein diger ulv. Den kastar seg over han, og Fantomet har ikkje pistolane sine. Fantomet tek opp kniven sin, kappar av den eine framlabben og ulven stikk av.
Tilbake på Rosenhag finn dei baronesse Germaine i kjellaren. Oppe i hallen oppdagar dei eit blodspor som ledar opp til soverommet. Jacob og Fantomet går opp, og ser at vindauget er ope. Dei ser ut, og nede på bakken ligg Irma med berre ei hand. Den andre er kappa av ved handleddet.
|
|
|
|
